गुल्मी। गुल्मीको रुरुक्षेत्र गाउँपालिका–४, बलेटक्सारस्थित रेन्बो इङलिस सेकेण्डरी बोर्डिङ स्कूलले माध्यमिक शिक्षा परीक्षा एसईई २०८२ मा निजी विद्यालयतर्फ जिल्लामै उत्कृष्ट नतिजा हासिल गरेको छ । विद्यालयका दुई विद्यार्थीले ४.०० जीपीए ल्याएपछि प्याब्सन गुल्मीले विशेष सम्मान गरेको हो ।
विद्यालयका विद्यार्थी आरुषा श्रेष्ठ र होमराज पन्थीले ४.०० जीपीए प्राप्त गर्दै जिल्लाका संस्थागत विद्यालयमध्ये उत्कृष्ट नतिजा हासिल गरेका हुन् । विद्यालयले यस वर्ष शतप्रतिशत विद्यार्थी उत्तीर्ण गराउन समेत सफल भएको जनाएको छ ।
दुई जना विद्यार्थीले ४ जीपीए ल्याएपछि विद्यालयले ५० हजार नगदसहित सम्मान गरिएको विद्यालयका प्रिन्सिपल योजन खत्रीले बताए । यसवर्ष संस्थागत विद्यालय तर्फ यश विद्यालयले मात्रै ४ जीपीए ल्याएको हो ।
यस वर्षको एसईई परीक्षामा ५ वटा विद्यालयका ६ जना विद्यार्थीले ४ जीपीए हासिल गरेका छन्। ४ जीपीए ल्याउने विद्यार्थीहरूमा सामुदायिक विद्यालयका महेन्द्र मावि तम्घासकी अस्मिता पाण्डे, रिडी मावि रिडीकी मर्यादा पौडेल, शारदा मावि दिगाम–चन्द्रकोटका रीतिका गौतम र रेसुङ्गा मावि तम्घासकी दीक्षा पोखरेल रहेका छन्।
संस्थागत विद्यालयले उपलब्धिपछि प्याब्सन गुल्मीको टोली विद्यालयमै पुगेर विद्यार्थी, शिक्षक तथा विद्यालय परिवारलाई सम्मान तथा बधाई ज्ञापन गरेको हो । सम्मान कार्यक्रममा विद्यार्थी, शिक्षक, अभिभावक र स्थानीयको उल्लेख्य सहभागिता रहेको थियो ।
विद्यालयले बधाई तथा शुभकामना ¥यालीसहित बलेटक्सार बजार परिक्रमा समेत गरेको थियो । सहभागीहरूले अबिर जात्रा गर्दै खुसी साटासाट गरेका थिए ।
कार्यक्रममा प्याब्सन गुल्मीका अध्यक्ष राजु कुँवरले गुल्मी जिल्लाका संस्थागत विद्यालयहरूले यस वर्षको एसईई नतिजामा ऐतिहासिक सफलता हासिल गरेको बताए । उनले रेन्बो इङलिस बोर्डिङ हाई स्कूल जिल्लाकै उत्कृष्ट विद्यालय बन्न सफल भएको उल्लेख गर्दै विद्यालय परिवार, शिक्षक, अभिभावक तथा विद्यार्थीलाई बधाई दिए ।
उनले जिल्लाका अन्य संस्थागत विद्यालयहरूले पनि उत्कृष्ट नतिजा ल्याएको उल्लेख गरे । रेसुङ्गा नगरपालिकाका आदर्श विद्या आश्रम इङ्लिस बोर्डिङ स्कुल र रिडर्स पब्लिक हाई स्कूल, चन्द्रकोट गाउँपालिकाको चक्रेश्वर इङ्लिस बोर्डिङ स्कुल शान्तिपुर तथा गुल्मीदरबार गाउँपालिकाको ग्रीन बोर्डिङ इङ्लिस बोर्डिङ स्कुल बिरबासले पनि शतप्रतिशत नतिजा हासिल गरेको अध्यक्ष कुँवरले बताए ।
अध्यक्ष कुँवरले संस्थागत विद्यालयबाट ४.० जिपिए प्राप्त गर्ने विद्यार्थीलाई प्रति विद्यार्थी ५० हजार रुपैयाँ प्रोत्साहन पुरस्कार प्रदान गरिने घोषणा समेत गरेका छन् । उनले मेहनती विद्यार्थी, समर्पित शिक्षक र सचेत अभिभावकको संयुक्त प्रयासले यस्तो सफलता सम्भव भएको उल्लेख गर्दै आगामी दिनमा पनि गुणस्तरीय शिक्षा प्रवद्र्धनका लागि प्याब्सन गुल्मीले विभिन्न कार्यक्रम सञ्चालन गर्ने बताए ।
उत्कृष्ट नतिजाले बलेटक्सारसहित समग्र गुल्मी जिल्लाकै शैक्षिक गरिमा उचालिएको रेन्बो इङलिस सेकेण्डरी बोर्डिङ स्कूलले जनाएको छ । 
